Türkmənistan ölkədə ilk yeraltı qaz anbarını (UGS) tikəcək. Raport.az-ın məlumatına görə bu barədə hökumətin rusdilli “Neytral Turkmenistan” qəzeti yazır.
Yanacaq-energetika kompleksinə nəzarət edən baş nazirin müavini Şahım Abdrahmanov videobağlantı vasitəsilə hökumətin iclasında ölkədə “kommersiya qaz ehtiyatlarını təmin edən ilk UGS obyekti”nin tikintisi barədə danışıb.
O bildirib ki, “beynəlxalq təcrübəyə uyğun olaraq, texniki-iqtisadi əsaslandırmanın hazırlanması, layihələndirilməsi, təchiz edilməsi və tikintisi üçün beynəlxalq konsaltinq şirkətlərinin cəlb edilməsi nəzərdə tutulur”.
Qəzet vurğulayır ki, prezident Serdar Berdiməhəmmədov məruzəni dinlədikdən sonra qaz ehtiyatlarından səmərəli istifadənin vacibliyini və etibarlı xarici tərəfdaşlarla əməkdaşlığın daha da artırılması üçün tədbirlərin görülməsinin vacibliyini qeyd edib.
Xatırladaq ki, Türkmənistan təbii qaz ehtiyatlarına görə Rusiya, İran və Qətərlə birlikdə dünyanın ilk dörd ölkəsindən biridir.
