Təlim, Mühasibat Baş İdarəsinin Xərclər və Aktivlərin İdarə Edilməsi Şöbəsinin müdiri Sərtaç Bezci rəhbərliyində Türkiyədən gəlmiş təlimçilər tərəfindən 20–23 may tarixlərində Azərbaycan Respublikası Maliyyə Nazirliyində keçirilib. Təlimdə 51 rəhbər şəxs və mütəxəssis iştirak edib.

Təlimin açılış mərasimində Azərbaycan Respublikası Maliyyə Nazirliyinin İdarəetmə İşləri üzrə rəhbəri Natiq Həsənov, Türkiyə Mühasibat Baş İdarəsinin Xərclər və Aktivlərin İdarə Edilməsi Şöbəsinin müdiri Sərtaç Bezci, TİKA Bakı Proqram Koordinatoru Hayreddin Özçelik iştirak ediblər.

Tədbirdə çıxış edən Azərbaycan Respublikası  Maliyyə Nazirliyinin İdarəetmə İşləri rəhbəri Natiq Həsənov iki ölkə arasındakı güclü münasibətlərin dövlət maliyyəsi sahəsində də davam etdiyini vurğulayaraq, təşkil olunan bu təlimin Türkiyənin bu sahədəki təcrübəsinin Azərbaycana ötürülməsi baxımından çox faydalı olduğunu qeyd edib. Natiq Həsənov təlimin təşkilində əməyi keçən Türkiyə Respublikası Xəzinə və Maliyyə Nazirliyinə və TİKA-ya təşəkkürünü bildirib.

Mühasibat Baş İdarəsinin Xərclər və Aktivlərin İdarə Edilməsi Şöbəsinin müdiri Sərtaç Bezci isə çıxışında bildirib: “Uzun müddətdir üzərində çalışdığımız və tətbiq etdiyimiz dövlət maliyyə idarəetmə informasiya sistemi ilə bağlı bilik və təcrübəmizi paylaşmaq, qardaş ölkə Azərbaycanla bu sahədə qarşılıqlı öyrənmək məqsədilə Bakıda olmaqdan məmnunluq duyuruq.”

TİKA Bakı Proqram Koordinatoru Hayyeddin Özçelik isə qeyd edib: “Azərbaycan Respublikasının Prezidenti cənab İlham Əliyevin rəhbərliyi ilə dövlət maliyyəsinin idarə olunması sahəsində atılan qətiyyətli addımları və bu sahədə göstərilən uzaqgörən yanaşmanı təqdirlə izləyirik. TİKA olaraq həyata keçirdiyimiz bu təlim proqramı vasitəsilə Türkiyənin dövlət maliyyəsinin rəqəmsallaşdırılması yolunda əldə etdiyi təcrübələri dost və qardaş Azərbaycanla paylaşmaqdan böyük məmnunluq duyuruq.”

Təlimin sonunda iştirakçılara sertifikatlar təqdim olunub.