7 iyun 2024-cü il tarixində Salyan 1 saylı Mediasiya Təşkilatının ictimai təqdimat mərasimi təşkil edilmişdir. Təşkilat fəaliyyətə başladığı dövrdən formalaşma mərhələsini keçmiş və keyfiyyətli mediasiya xidmətlərinin həyata keçirilməsi üçün vətəndaş yönümlü ofislə şəraiti təmin edilmişdir. Burada vətəndaşlara ən yüksək səviyyədə keyfiyyətli xidmətlərin göstərilməsi üçün hər cür şərait yaradılmışdır.
İctimai təqdimat mərasimindən öncə iştirakçılar Azərbaycan xalqının ümummilli lideri Heydər Əliyevin abidəsini ziyarət edib, xatirəsinə hörmət və ehtiram əlaməti olaraq abidənin önünə gül dəstələri qoyublar. Daha sonra Salyan Rayon İcra Hakimiyyətinin başçısı Sevindik Hətəmov ictimai təqdimatda iştirak edən mediatorları qəbul edib. Mediasiya Şurasının İdarə Heyətinin sədri Nadir Adilov Rayon İcra Hakimiyyətinin başçısı Sevindik Hətəmova Salyan 1 saylı mediasiya təşkilatına hər zaman yerli səviyyədə göstərilən diqqət və dəstəyə görə təşəkkür edib. İcra başçısı Sevindik Hətəmov mediatorların fəaliyyətinə uğurlar arzu edib və Salyan 1 saylı mediasiya təşkilatının fəaliyyətinin uğurlu olduğunu qeyd edib.
Salyan 1 saylı mediasiya təşkilatının ictimai təqdimat mərasimində Mediasiya Şurasının İdarə Heyətinin sədri Nadir Adilov, Salyan Rayon İcra Hakimiyyəti başçısının İctimai, Siyasi və Humanitar Məsələlər üzrə müavini Rəşad Cəbrayılov, Yeni Azərbaycan Partiyası rayon təşkilatının sədri Elmar Əhmədov, Rayon İcra Hakimiyyətinin Hüquq şöbəsinin müdiri Ruslan Məmmədov, Qələbə qəzetinin redaktoru Rüstəm Məlikov, Mediasiya Şurasının Etika Komitəsinin sədri Aqil Əsgərov, Komitənin üzvü Tural Məmmədov, Cəbrayıl 1 saylı Mediasiya Təşkilatının rəhbəri Tahir Balakişiyev, Sabirabad 1 saylı Mediasiya Təşkilatının rəhbəri Musa Ramazanov, mediatorlar Taryel İsgəndərov, Aybəniz Səmədova və Salyan rayonunun ictimaiyyət nümayəndələri iştirak etmişdir.
İctimai təqdimat mərasimində çıxış edən Mediasiya Şurasının İdarə Heyətinin sədri Nadir Adilov qeyd etmişdir ki, mediasiya təşkilatlarının ilkin vaxtlarda özlərini keyfiyyətli ofis şəraitləri ilə, vətəndaş yönümlü ofislərlə təmin olunmaqda ciddi problemləri var idi. Amma çox sevindirici haldır ki, ölkəmizdə mediasiya xidmətləri inkişaf etdikcə region mediasiya təşkilatları da vətəndaş yönümlü ofislərdə fəaliyyət göstərə bilirlər. Çıxış edən Salyan Rayon İcra Hakimiyyəti başçısının müavini Rəşad Cəbrayılov Salyan 1 saylı mediasiya təşkilatının fəaliyyətini yüksək qiymətləndirib və təşkilatın fəaliyyətinə uğurlar arzu edib.
Təqdimat mərasimi zamanı eyni zamanda mediasiya xidmətlərinin həyata keçirilməsində vətəndaş məmnunluğu, mediasiyada əldə edilən barışıq sazişlərinin keyfiyyətli məzmunu, problemlər və qarşıda duran hədəflər də müzakirə edilib.
