Paris və digər şəhərlərdə hüquq-mühafizə orqanları ilə toqquşmalar baş verib. Fransızlar prezident Emmanuel Makronun bu məsələ ilə bağlı çıxışı fonunda pensiya islahatına etiraz ediblər. Azadmedia.az Le Figaro-ya istinadla xəbər verir ki, polis gözyaşardıcı qazdan istifadə edib.
Nümayişlərdə etirazçılar Makronun çıxışı zamanı qaşıqları qablara çırpıblar. Prezident televiziya ilə çıxışında pensiya islahatları ilə yanaşı iş və yaşayış şəraitinin yaxşılaşdırılmasına söz verib. O, cəmiyyətin konsensusa gələ bilməməsindən təəssüfləndiyini bildirib.
Parisdə polisin məlumatına görə, ümumi sayı 2000 nəfər olan üç aksiya baş tutub. Nümayişçilər zibil qutularını yandırıblar. Renndə 1 minə yaxın, Lion və Marseldə bir neçə yüz adam toplaşıb. Fransanın digər şəhərlərində də aksiyalar keçirilib. Onların bir çoxunda iğtişaşlar, toqquşmalar baş verir. Polisin Bordo, Renn və Lionda gözyaşardıcı qazdan istifadə etdiyi məlumdur.
Emmanuel Makronun islahatı 2030-cu ilə qədər pensiya yaşını 62-dən 64-ə qaldırır. Parlamentdən yan keçərək hökumət tərəfindən qəbul edilib. Müxalifət partiyaları hökumətə etimadsızlıq votumu irəli sürdülər, lakin lazımi 287 səslə onun gedişinə 278 deputat səs verib. Aprelin 14-də Fransa konstitusiya şurası bəzi qeyd-şərtlərlə islahatı qanuni kimi tanıdı.
