Estoniya Rusiyanın dondurulmuş aktivlərini Ukraynaya keçirmək niyyətindədir
Estoniyanın xarici işlər naziri Urmas Reinsalu Postimees-ə bildirib ki, Estoniya hakimiyyəti dondurulmuş Rusiyanın 17 milyard avroluq aktivlərinin Ukraynaya köçürülməsi mexanizmini hazırlamaq niyyətindədir. Vəsaitlərin dəqiq nə vaxt köçürülə biləcəyi məlum deyil.
Nazirin sözlərinə görə, Rusiya aktivlərinin Kiyevə ötürülməsi prosesi irəli getmir, baxmayaraq ki, Avropa İttifaqı (Aİ) ölkələri artıq Avropa Komissiyasına (AK) bunun üçün lazımi hüquqi sxem hazırlamağı tapşırıblar. “Biz bunu hökumətdə müzakirə etdik və qərara gəldik ki, paralel olaraq bu pulların istifadəsinə imkan verəcək hüquqi struktur yaratmağa başlayaq”, – deyə XİN rəhbəri vurğulayıb. O əlavə edib ki, Estoniyanın belə bir addımı beynəlxalq hüquqda presedentlər yaradacaq.
AK dondurulmuş aktivlərin müsadirəsini qanuniləşdirmək istəyir. Oktyabr ayında Avropa Şurası AK-yə Ukraynanın bərpası üçün dondurulmuş Rusiya aktivlərinin köçürülməsi variantlarını hazırlamağı tapşırmışdı. Kiyev həmçinin dəyən ziyana görə Rusiyanın kompensasiyası ilə bağlı BMT qətnaməsinin qəbul edilməsinə çalışır. Kreml bunu “banditizm” hesab edir. Noyabrda Aİ hüquqşünasları Rusiya Mərkəzi Bankının dondurulmuş aktivlərinin Ukraynaya köçürülməsi mexanizmini işləyib hazırlamağa başlayıblar.
