Ankara keçiləri (angora keçiləri) tarixi boyunca unikal yun keyfiyyəti ilə tanınan heyvanlardır. Bu keçilər əsasən incə və parlaq yunları ilə məşhurdur. İndi də Ankara tarix muzeyinin yaxınlığında yerləşən meydanda bu keçilərin yununu və onlardan hazırlanmış sapları və əşyaları almaq mümkündür.
Ankara keçilərinin mənşəyi qədim dövrlərə gedib çıxır. Bu keçilər, əsasən, Anadolu bölgəsinin paytaxtı olan Ankara ətrafında yetişdirilib və adlarını da bu şəhərdən alıblar. Tarixi mənbələrə görə, Ankara keçiləri eramızdan əvvəl 8-ci əsrdən etibarən mövcud olub. Bu cins keçilər daha çox qədim Osmanlı İmperiyası dövründə məşhurlaşmışdır. Keçilərin xüsusi olaraq seçilməsi və yetişdirilməsi nəticəsində moher yunu ixrac edilərək, dünyanın müxtəlif ölkələrində böyük tələbata malik olmuşdur.
Yunları həm toxuculuqda, həm də müxtəlif sənaye sahələrində geniş istifadə olunur. Ankara keçisinin yunu, dünyanın ən qiymətli tekstil materiallarından biri hesab edilir. Keçilərin bu cinsinin tarixi yüzilliklər əvvələ gedir və onların mənşəyi, əsasən, Türkiyə ilə, daha dəqiq desək, Ankara ilə bağlıdır.
Tarixi mənbələrdə göstədilir ki, Türkiyədən bu keçilərdən alıb aparan Avropa dövlətləri yunundan və sapından istifadə etməsinlər deyə, heyvanlar qısırlaşdırılırdı.
XVI əsrdə Ankara keçiləri Avropaya ixrac edilməyə başladı. Lakin keçilərin dünya miqyasında məşhurlaşması XIX əsrin əvvəllərinə təsadüf edir. Bu dövrdə keçilər Cənubi Afrika, Amerika və Avstraliyaya gətirildi və yeni təsərrüfatlarda uğurla yetişdirilməyə başlandı.
Ankara keçisinin yunu – moher – tekstil sənayesində ən çox tələb olunan materiallardan biridir. Bu yun digər heyvan yunlarından fərqli olaraq, çox incə və parlaqdır. Moherin bu xüsusiyyətləri ona yüksək elastiklik və davamlılıq verir. Bu xüsusiyyətləri ilə moher yunundan istehsal edilən paltarlar və toxuculuq məhsulları çox uzun ömürlü və keyfiyyətli olur.
Ankara keçiləri ildə təxminən iki dəfə yun verirlər və hər dəfə 5-6 kiloqram moher yunu əldə etmək mümkündür. Moher yunundan hazırlanan məhsullar, xüsusən də soyuq iqlimlərdə populyardır. Çünki moher yunundan hazırlanan geyimlər həm çox isti, həm də yüngül olur.
Ankara keçiləri quraq və dağlıq iqlimlərə uyğunlaşmış heyvanlardır. Onlar otlaqlarda çox yaxşı yaşayırlar və dağlıq ərazilərin kəskin hava şəraitinə qarşı davamlıdırlar. Keçilərin baxımı çox diqqətli olmalıdır, çünki onların yununun keyfiyyəti əsasən baxımdan asılıdır. Hər il düzgün şəkildə qırxılmaları və sağlamlıq vəziyyətlərinin nəzarət altında saxlanması yunun keyfiyyətinə birbaşa təsir edir.
Qeyd edim ki, Ankara həm də pişikləri və dovşanları ilə məşhurdur. Həmin növ pişik və dovşanlara başqa yerlərdə rast gəlinmir.
Elnurə Abuşova
