Ankara və Moskva Rusiyanın təklif etdiyi qaz qovşağı layihəsi üzərində işləyirlər. Avropa ölkələrinin tələbi ilə suallara aydınlıq gətirilir
Raport.az bildirir ki, bu barədə Türkiyənin xarici işlər naziri Mövlud Çavuşoğlu bildirib.
Rusiya Federasiyası və Türkiyə prezidentləri bundan əvvəl Türkiyədə qaz qovşağının yaradılması məsələsini ətraflı şəkildə işləyib hazırlamağı müzakirə edib. Qeyd edək ki, bu qovşaq vasitəsilə zədələnmiş “Şimal axını”ndan qaz nəqlini həyata keçirmək mümkündür. Söhbət təkcə Türkiyədə ticarət platformasının yaradılmasından deyil, həm də cənub istiqamətində infrastrukturun inkişaf etdirilməsi və təchizatın artırılmasından gedir, deyə Rusiya Federasiyası baş nazirinin müavini Aleksandr Novak bildirib. Onun sözlərinə görə, burada başqa ölkələr də iştirak edə bilər: Əlcəzair, Qətər və Azərbaycan da cənub istiqamətindən Avropaya qaz nəql edir.
“Rusiyanın təklif etdiyi qaz qovşağı layihəsinə gəlincə, iki ölkənin nazirlikləri bunun üzərində işləyir. Əslində bu təklif Avropaya ünvanlanıb, bu baxımdan Avropa ölkələrindən tələbat var. Hazırda planın reallaşdırılması istiqamətində iş aparılır. İstanbulda keçiriləcək qaz forumu bu baxımdan bir fərq yaradacaq”, – Çavuşoğlu cümə günü Ankarada italyan həmkarı ilə keçirdiyi mətbuat konfransında bildirib.
