ABŞ Suriya, İraq və Yəməndəki hazırkı bombardmanlarla məhdudlaşmayacaq və İordaniyadakı qüvvələrinə qarşı hücuma cavab olaraq əlavə zərbələr endirmək niyyətindədir. Bunu ABŞ prezidentinin milli təhlükəsizlik üzrə köməkçisi Ceyk Sallivan deyib.
“Biz əlavə zərbələr endirəcəyik və ABŞ-ın öz qüvvələrinə qarşı hücumlara və öz xalqının öldürülməsinə cavab verdiyini aydınlaşdırmaq üçün əlavə tədbirlər görəcəyik”, o, NBC telekanalında deyib.
ABŞ səlahiyyətliləri daha əvvəl İordaniyadakı Amerika əsgərlərinin İraq İslam Müqaviməti tərəfindən hücuma məruz qaldığını bildirmişdilər. Pentaqonun məlumatına görə, bu zərbə nəticəsində 3 Amerika hərbçisi həlak olub, 40-dan çoxu yaralanıb. ABŞ baş verənlərə görə də İranı günahlandırır. ABŞ prezidenti Co Bayden daha əvvəl təsdiqləmişdi ki, o, Vaşinqtonun İordaniya-Suriya sərhəddindəki hücuma dəqiq necə cavab verəcəyi ilə bağlı artıq qərar verib.
