Giresun, Türkiyənin şimal-şərqində, Trabzon şəhərindən təxminən 175 kilometr qərbdə yerləşir. Qara dəniz sahilində yerləşən şəhər Giresun vilayətinin mərkəzidir və 2024-cü ilin rəsmi statistik məlumatlarına əsasən əhalisi təxminən 147,682 nəfər təşkil edir. Bu şəhər həm tarixi mirası, həm də müasir turizm infrastrukturuna görə bölgənin inkişaf edən mərkəzlərindən biridir.
Giresunun tarixi eramızdan əvvəl 2000-ci ilə qədər uzanır. Antik dövrdə şəhərin adı yunan dilində Kerasunta (Κερασούντα) və ya Cerasus kimi tanınırdı. Bu ad “buynuzvari yarımada” mənasını verən “keras” sözündən götürülüb. Şəhərin ətrafı uzun müddət boyunca Kaşka, Kolx (Laz), Fars və Roma kimi fərqli imperiyalar və tayfalar tərəfindən idarə olunmuşdur.
Eramızdan əvvəl VII əsrdə Miletli yunan kolonistləri tərəfindən Kolxida ölkəsinin bir hissəsi kimi salınan şəhər eramızdan əvvəl VI əsrdə Fars İmperiyası, daha sonra isə Makedoniyalı İskəndər tərəfindən fəth edilmiş, ardınca Pontus Krallığı və Roma İmperiyası tərəfindən idarə olunmuşdur.
Giresun Roma dövründə o qədər əhəmiyyətli idi ki, öz adına sikkə zərb etmə hüququ əldə etmişdi. 1397-ci ildə Əmiroğlu Süleyman bəy və Pir Kadem Çakır bəy tərəfindən fəth edilən şəhər, 1461-ci ildə isə Osmanlı İmperiyasının nəzarətinə keçmişdir.
Giresun həm iqtisadi, həm də mədəni baxımdan Türkiyənin əhəmiyyətli şəhərlərindən biridir. Şəhərin iqtisadiyyatının əsas dayaqlarından biri fındıqçılıqdır. Dünyada fındıq istehsalının 73%-ni təmin edən Türkiyənin ən məhsuldar fındıq bölgəsi məhz Giresundur. Bu səbəbdən də şəhər “fındıq paytaxtı” adlandırılır. Eyni zamanda, gilasın (kirazın) vətəni olaraq tanınan Giresun, bu meyvənin dünyaya yayılmasında mühüm rol oynamışdır.
Son illərdə Giresun, daxili və xarici turistlərin böyük marağına səbəb olmuşdur. Giresun Mədəniyyət və Turizm Müdirliyinin verdiyi məlumata əsasən 2024-cü ildə şəhərə təxminən 570 min turist səfər edib. Onlardan təxminən 400 mini yerli, 170 mini isə xarici turist olmuşdur. 2025-ci ilin ilik 6 ayında turist sayında təxminən 12% artım müşahidə olunur.
Bu artım bölgədəki yayla turizmi, çimərlik turizmi və tarixi yerlərə olan marağın artması ilə izah olunur. Giresun Universitetinin Turizm və Otelçilik Fakültəsinin araşdırmasına əsasən, şəhərə səfər edən turistlərin 60%-i təbiət mənzərələrinə, 30%-i isə tarixi yerlərə maraq göstərir.
Giresun bir çox tarixi və təbiət abidələri ilə zəngindir. Aşağıdakı məkanlar şəhərin turizm xəritəsində önəmli yer tutur:
1. Giresun qalası
E.ə. II əsrdə Pontus kralı I Farnekes tərəfindən inşa edilən bu qala Qara dənizə baxan möhtəşəm mənzərəsi ilə şəhərin simvollarından birinə çevrilib. Qalanın ətrafında Osmanlı dövrünə aid məqbərələr də mövcuddur.
2. Bulancak
Giresundan cəmi 17 km aralıda yerləşən bu rayon Paşakonağı yaylası, tarixi binaları və təmiz sahilləri ilə tanınır.
3. Tirebolu
Qara dəniz sahilində yerləşən bu bölgə Uzunkum, Beygir Kumu və Tirebolu çimərlikləri ilə məşhurdur. Qala və çimərliklər turistlərin diqqət mərkəzindədir.
4. Görele
Qara dənizin İncisi sayılan bu bölgə Sis Dağ Yaylası və Deliklitaş çimərliyi ilə tanınır. Dokuzgöz Milli Parkı da bölgənin əsas təbiət turizmi məkanlarındandır.
5. Espiye
Andoz qalası, Kanun körpüsü kimi tarixi yerləri ilə tanınır. Mavi bayraqlı çimərlikləri və tarixi atmosferi ilə həm istirahət, həm də mədəni səyahət üçün ideal məkandır.
6. Şebinkarahisar
Roma dövründən qalma qalası, Məryəm Ana Manastırı, Atatürk Evi və Muzeyi bu rayonu mədəni turizm üçün cazibədar edir.
Giresun təkcə Qara dəniz bölgəsinin deyil, bütün Türkiyənin unikal tarixi və təbii sərvətləri ilə zəngin şəhərlərindən biridir. Fındıq bağları, qədim qalalar, yayla festivalları, mavi bayraqlı çimərliklər və misilsiz qonaqpərvərliyi ilə bu şəhər tədqiqatçılar, turistlər və təbiətsevərlər üçün böyük maraq kəsb edir.
Tarixlə təbiətin qovuşduğu bu nadir şəhərə səyahət etmək, sanki zamanla bir yolçuluğa çıxmaqdır. Giresun — keçmişin izlərini daşıyan, gələcəyə inamla addımlayan bir cənnət məkanıdır.
- t
