Rəqəmsal imza bazarında monopoliya aradan qalxır: SİMA rəqabəti gücləndirir
Dövlət Vergi Xidmətinin elektron xidmətlərinə SİMA rəqəmsal imza sisteminin inteqrasiyası yekunlaşıb. Bu yeniliklə fərdi sahibkarlar new.e-taxes.gov.az portalı üzərindən elektron qaimə-fakturaları və vergi bəyannamələrini artıq SİMA vasitəsilə təqdim edə biləcəklər. İstifadəçilərə 6 aylıq ödənişsiz istifadə imkanı da təqdim olunub.
Bununla da identifikasiya və elektron imza xidmətlərində illərdir mövcud olan monopolist vəziyyət dəyişir. İndiyədək bu xidmətlər yalnız “Best Solutions” adlı xarici şirkətə məxsus “ASAN imza” ilə mümkündür və bu şirkətin təxminən 1 milyon aktiv istifadəçisi var. Nəticədə milyonlarla manatlıq aylıq gəlir təkcə bir bazar iştirakçısına yönəlirdi.
SİMA-nın tətbiqi bu sahədə rəqabətli mühitin formalaşmasına imkan yaradır. İki illik hazırlıqdan sonra baş tutan inteqrasiya bu inhisarın aradan qalxması baxımından ciddi addım hesab olunur.
Son zamanlar Dövlət Vergi Xidməti rəqəmsallaşmaya böyük resurslar yönəldib, AVİS sistemi əsasında infrastruktur yenilənib və mobil tətbiq istifadəyə verilib. Digər tərəfdən, AzİnTelecom – hazırda AZCON Holdinqin tərkibində – biometrik identifikasiya əsasında çalışan SİMA sistemini genişləndirərək daha əlçatan edib.
SİMA-nın dövlət və özəl sektorda aktiv istifadə olunan xidmətlərə inteqrasiyası nəticəsində identifikasiya bazarında alternativlər yaranır. Bu da təkcə texnoloji deyil, iqtisadi baxımdan da mühüm hadisədir. Gəlirlərin bir şirkətdə cəmləşməsi ilə formalaşan qeyri-sağlam mühit dəyişir və rəqabət sayəsində sahibkarlar üçün daha əlverişli şərtlər yaranır.
Hazırda hüquqi şəxslər və dövlət qurumları üçün SİMA-nın inteqrasiyası davam edir. Gözləntilər ondan ibarətdir ki, yaxın zamanda bu mərhələ də başa çatsın və SİMA-nın əhatə dairəsi daha da genişlənsin.
Eyni zamanda, arzu olunur ki, 6 aylıq güzəşt müddətindən sonra tətbiq ediləcək tariflər sahibkarlar üçün münasib və əlçatan olsun. Bu, həm xidmətin dayanıqlı istifadəsi, həm də rəqabətli bazarın qorunması baxımından vacibdir.
